‏الكويت تستعد لاستقبال العائدين من صفوف “داعش” بـ”تصحيح أفكارهم”‏⁦‪ .


الكويت تستعد لاستقبال العائدين من صفوف “داعش” بـ”تصحيح أفكارهم”
كشفت وزارة الأوقاف الكويتية عن خطة لاستقبال موجة مرتقبة من الكويتيين العائدين، والذين انضموا سابقا للقتال في صفوف تنظيم “داعش”، الذي بدأ يتلاشى في العراق وسوريا.

ويأتي ذلك وسط مخاوف كويتية، من أن يشكل أولئك العائدون تهديدا أمنيا للبلاد بقناعاتهم وآرائهم الدينية الحالية.
وقال وكيل الوزارة، فريد عمادي، في مؤتمر صحفي اليوم، إن “الأوقاف واللجنة العليا لتعزيز الوسطية جاهزتان لاستقبال العائدين من تنظيم داعش، وتصحيح أفكارهم وفق برامج أعدتها الوزارة بواسطة نخبة من العلماء المتميزين”.
وتستهدف خطة وزارة الأوقاف، تغيير القناعات الفكرية لأعضاء التنظيم، والتي دفعتهم لترك الكويت، والقتال معه في سوريا والعراق، لكنها لا تخفف من العقوبات، التي يواجهونا عند عودتهم لبلادهم ،وخضوعهم للتحقيقات الأمنية، ومن ثم المحاكمة.
ولم يكشف المسؤول الحكومي، عن أعداد دقيقة أو تقريبية للكويتيين، الذين يقاتلون مع التنظيم في العراق أو سوريا.
لكن وسائل الإعلام المحلية أشارت، إلى عودة البعض منهم مؤخرا، إذ تم توقيف وتقديم أشخاص منهم للمحاكمة، فيما يتوقع أن يعود المزيد بعد خسارة تنظيم “داعش” لغالبية المدن والبلدات، التي كانت تحت سيطرته.
وأشار وكيل الوزارة، في حديثه عن العائدين من أعضاء التنظيم، إلى تجربة سابقة لبلاده مع العائدين أو المنتمين لتنظيمات مسلحة، مثل خلية “أسود الجزيرة” المرتبطة بتنظيم القاعدة، والتي شنت عدة هجمات في الكويت عام 2005، قبل القبض على بعض عناصرها وسجنهم.

رسالة مواطن فقير الى صاحب السمو عن مرزوق الغانم ؟


سيدي صاحب السمو حفظك الله
تحملني أنا واحد بسيط .. مواطن عادي .. بس مقهور .. و مالنا أحد غيرك يعدل الأوضاع .. أكلمك لأني كنت سابقا قريب من مرزوق الغانم .. و هالشخص أعرفه عدل
طويل العمر 
عقب التقاعد سنة ٢٠٠٨ اتصل فيني مرزوق الغانم قبل الانتخابات و قال لي من هالكلام الزين و انتوا اهلنا و جماعتنا و احنا نبيك اتيي عندنا في bmw لان احنا نبي الناس الي نقدر نأمنهم على حلالنا و عرض علي مبلغ مغري .. و انا ريال توني متقاعد بس كنت أحس إني للحين عندي قدرة أخدم فقبلت العرض واشتغلت عندهم في bmw
عقب ما توظفت بشهرين صارت انتخابات ٢٠٠٨ .. فناداني مرزوق و انا بالدوام و قال يا فلان .. انتو ديوانيتكم عودة بالقادسية و انا اقرب واحد لكم .. قلت له ما يحتاي يا بو علي تبشر بالصوت من كل عيالنا .. قال لا .. الصوت ما يكفيني .. أنا أبي أبدل فيكم .. قلت هذي ما اقدر عليها .. كل من له قناعته الخاصة و علاقاته و آنا كل الي اقدر عليه اني اطلب منهم صوت لك .. انا يوم قلت هالكلمة .. انكشف لي ويه مرزوق الثاني .. قام يعايرني و انا الي سويت لك و انا و انا .. قلت له يا بو علي انت تعطيني راتب مقابل خدمة .. مو منحة و الا صدقة .. رفع صوته علي قلت له حدك بو علي .. ما عاش الي يرفع صوته علي .. انا دشيت عندك محشوم و اطلع محشوم .. قمت و قدمت استقالتي و مشيت
قبل الانتخابات باسبوعين ما وعيت الا بهالي يدق علي جرس البيت ..الا مرزوق بكبره يايني وياه اخوه خالد .. يايني يتسامح مني و يحببني .. و يقول انت فهمتني غلط .. المهم طيح الحطب و لزم علي ارجع الدوام و رديت .. ما طلع الا و اهو مذكرني باصوات اهلنا و ان الانتخابات قربت و قلت له لا يحاتي
صارت الانتخابات و ياب له ١٢ الف صوت و اهو الي كان محسسني جن صوتي و صوت اهلي اهو الي بينجحه .. المهم باركنا له و قلنا عسى الله يوفقك .. و الصراحة يا طويل العمر احنا نستانس لي شفنا من عيال الكويت مثل مرزوق .. شباب و طموح .. و كنا هاقين فيه كل خير 
مشت الأيام .. و بدت المناقصات تهل علينا بالدوام من كل صوب .. BM و غير BM .. ما بقى دفاع .. ما بقى داخلية .. كهربا .. ديوان أميري .. تربية .. عد و خربط .. كل شي .. و انا كنت استلم بعض هالمناقصات .. ساعات تييني معلومة عن منافسيننا انهم بيقدمون سعر اقل منا .. اقول لهم لازم انزل سعرنا .. يقولون لي ما عليك المناقصة يايتنا يايتنا .. اثاري الشيخ ناصر المحمد رئيس الوزرا فاتح لهم كل شي بحري .. يمكن سكوتي كان غلط حزتها بس انا ماني منكر حسنة .. و لا اني فتيني فسكت و بلعتها .. 
تالي بديت أشوف مرزوق و خلافاته مع عيال الأسرة .. و كنت أسمع اللهجة الي يتكلم فيها عن بعض عيال الأسرة في المجالس الخصة .. كل ما قال .. قال بأربيهم .. و يعلمهم قدرهم .. يبي يعلمهم قدرهم و اهم شيوخ!! .. اول ما بدى مرزوق .. قام يسب أحمد الفهد و طلال الفهد .. و تالي عذبي الفهد .. .. و مادري شلون قلت يمكن اهم غلطانين الله يهداهم .. و حاولت أبرر حق مرزوق .. تالي سنة ٢٠١١ أيام المظاهرات ضد ناصر المحمد ما وعيت الا مرزوق و ربعه يعلنون إنهم رصاصات خمس في سدر الحكومة .. انا هني ما قدرت اتحمل .. رحت له و قلت يا بو علي .. ما يصير .. انت جذي تهز أركان النظام .. و الشيخ ناصر هذا خيار الأمير .. قال لي هذا فاسد و فعلته و تركته .. قلت له اذا اهو فاسد .. فشركاتكم اكبر المستفيد من فساده .. هني ردينا على المعاير .. قام يعايرني بالراتب الي يعطيني اياه و البونس .. قلت له شرهتك علي اذا طبيت شركتك نوبة ثانية .. انا الي ما يحشم شيوخنا ما أحشمه
طافت الأيام .. و صارت مظاهرات كرامة وطن الي وراها كل اهل الفوضى .. و طلعت انت يا طويل العمر و قلت أعينوني .. و كل ابونا قلنا تامر يا بو ناصر .. كنا نشوف الربيع العربي و شسوى بالدول الي حاشهم .. و خفنا لا يصير نفس الشي بالكويت .. احنا ما نحب الفوضى .. و الولاء فينا فطرة مو اصطناع .. المهم يينا وصوتنا بانتخابات الصوت الواحد الأولية .. و مرزوق و ربعه قاطعوا وحرضوا على المقاطعة .. لا و ختمها يوم يتطاول على الشيخ نواف و قال انه يرشي الفاسدين .. هني قلت لا طالت و شمخت .. و تأكدت انه مرزوق هذا منقع زرنيخ .. و الطيب الي سويتوا فيه ما يفيد فيه .. و اقتنعت ان مستقبله السياسي انتهى عقب الي سواه .. 
و عقب ما انحل المجلس و عقب حكم الدستورية قرر الحبيب يترشح الحين عقب ما قاطع و حرض عالمقاطعة .. و قال عن المرسوم الي طلع منك انه مهزلة .. والله يا طويل العمر ما وعيت الا بمرزوق داق علي تلفون .. هلا بو فلان .. تكفه اخوك نازل .. و هذي انتخابات صعبة .. و انا مالي غنى عنكم .. قلت له يا مرزوق .. عقب الي صار بيني و بينك شلون تكلمني و تطلب الصوت؟ من صجك؟ و بعدين وينك يوم الكويت كانت محتاجتك؟ ليش ما ترشحت؟ أو عالأقل صوتت ؟ و عالأقل مكرمنا بسكوتك؟ قال لا انت ما ترضى علي أصير حالي حال علي الراشد .. قلت الله .. الحين صار الي يسمع كلام الأمير حاله حال علي الراشد؟ .. قلت يا بو علي ترى ما لك شي عندي .. لا أنا و لا أهلي و صكيت التلفون
نجح الريال و حطته الحكومة رئيس .. شسوى لكم؟ شنهي القيمة الي وفرها لكم؟ سويتوا له الي ما استوى .. و كل ما سويتوا له شي تحرونا احنا يا أهل الكويت .. يعني يا طويل العمر .. تخليه يلقي كلمة في مؤتمر قمة حكام الخليج بالكويت .. وين صارت هذي؟. .. تخليه ينقل رسالتك حق بوش الأبو بصفته شنو؟ .. طويل العمر كل اسبوع و ترك طاق بشته و داش على الملك سلمان بصفته منو؟ .. خلت الأسرة؟ .. ما عندكم أحد من عيالكم؟
طويل العمر كل معركة بينه وبين أحد من عيال الأسرة نصرتوه انتو على عيالكم .. و الا اهو مو كفو ينتصر بروحه .. يستمد قوته منكم عشان يطق عيالكم .. شنهي الرسالة الي توصلونها حق باجي عيالكم؟ .. مرزوق أبدى علينا منكم ؟ .. لاحد فيكم يحط راسه براس مرزوق؟ .. شنهي الرسالة الي بتوصلونها حق أهل الكويت؟ .. ان مرزوق فوق الشيخ؟. .. لا يا طويل العمر الشيخ شيخ .. و المواطن مواطن .. حتى لو كان تاجر .. ما كنت أتصور اني انا يالفقير المسكين عندي غارية عالشيوخ أكثر منكم .. 
تدري شيقول مرزوق من وراك يا طويل العمر؟ يقول ما عليكم العود عندي .. تدري شيقول بعد؟ كل ما سوت الحكومة شي يزعل الناس .. قال هذي أوامرك .. و لي سوت شي زين قال هذي مني انا .. ترضى يا طويل العمر؟ .. يوم سحب الجناسي اهو الي حرض و برر .. و تالي قال شنسوي هذي أوامر الأمير .. و يوم رد الجناسي مادري شلون قنعك انك تسوي لجنة ترفع تقريرها حق رئيس المجلس عشان يطلع أهو بالزينة !! .. احنا احترينا يا طويل العمر .. بس انتو شلون راضين؟
طويل العمر .. يوم حطيت مرزوق رئيس .. ما فكرت بالشيخ نواف و الكلام الي قاله مرزوق عنه؟ شلون هان عليك أخوك ؟ .. يوم طاح الشيخ محمد العبدالله و قبلها سلمان الحمود و كل ربع مرزوق أيدوا طرح الثقة .. ما حركت شي فيكم؟ .. يوم يعاندك و يقول احنا الرصاصات الخمس شلون نسيتوها؟ .. ما أصدق إن الغارية ممكت تموت جذيه .. شلون اللحم يطلع من الدم .. شلون الشيوخ يبقون شيوخ اذا الهيبة راحت .. 
تصدق يا طويل العمر .. ساعات أحس انكم تبون تحققون نبوءة محمد الجاسم يوم قال انك راح تكون آخر شيوخ الهيبة .. ما بقى أحد من عيالكم نتأمل فيه؟ .. كل واحد هقينا فيه تكسر جدام عيونا و انتوا تطالعون؟
خل أقول لك يا طويل العمر شيقولون أهل الكويت .. يقولون ان مرزوق تمكن و بسط نفوذه لدرجة انكم لو تبون تشيلونه ما تقدرون .. معقولة؟ .. وصل لي هالمرحلة؟ .. قمت أسأل عمري .. لو عزمتوا تشيلونه .. من بقى لكم من عيالكم تشدون فيه الظهر؟ .. كلهم كسرتوهم عشان تراضون مرزوق .. و الي ما تكسر للحين خاضع حق مرزوق من الخوف و من الي شافه يصير بعيال عمك من قبلع .. يا خوفي ان مرزوق عرف أسراركم و إن هالشي مخوفكم منه ..
أذكرك يا طويل العمر احنا ولاءنا لكم ماهو حق تجار .. و كل يوم اتأخرون فيه بشيلته راح تصير شيلته أصعب .. و راح تكون هيبتكم كأسرة أقل .. الحبيب تغلغل بالداخلية .. نغلغل بالمالية و هيئة الاستثمار .. لا و باشرك .. تغلغل حتى بالقضاء .. الحق علينا و على الكويت و على الأسرة الي مالنا غناة عنها قبل لا يفوت الفوت .. و حزتها .. ترى ما ينفع الصوت .. 
تكفه يا سعد حربية .. تكفين يا سارة الفهد .. وصلوها له .. خل يقراها ابونا الله يطول بعمره .. ترى اذا اهو ما فكنا من مرزوق .. محد راح يفكنا منه .. و ترى الرؤوس أينعت .. لكن وين الي بيقطفها؟ 
تكفه يا أحمد النواف تكفه يا سالم النواف .. وصلوا حق أبوكم .. تكفه يا طلال المشعل .. و صلها حق أبوك ..الوضع ما يحتمل أي تأخير

اعلانات

موقع حفنة

مدونة حفنة هي موقع كويتي ، خليجي، عربي، عالمي، شامل يحوي اخبار تهمك في التكنولوجيا و السياسه و الاقتصاد و الاحوال الاجتماعية و ذلك باطار عام و بدون تحيز. يمكنك اختيار القسم من اعلي لتصفح المزيد من الاخبار

إحصائيات الموقع

  • عدد المقالات : 11265 مقالة.
  • عدد التعليقات : 1100 تعليق.
تصميم و تطوير شركة سبيس زوون - web design in kuwait